पुणे महापालिकेच्या उपायुक्ताची डिग्री बोगस; बारावी अनु्तीर्ण असताना बनावट पदवीची कागदपत्रे जोडून सेवा पुस्तिकेत नोंद

पुणे : बारावी अनु्तीर्ण असताना बनावट पदवीची कागदपत्रे जोडून सेवा पुस्तिकेत नोंद केल्याप्रकरणी महापालिकेचे तत्कालिन शिक्षणाधिकारी सुधाकर तांबे, उपायुक्त सोमानथ बनकर, लिपिकाविरुद्ध शिवाजीनगर पोलिसांनी गुन्हा दाखल केला. बनकर हे अतिक्रमण विभागाचे उपायुक्त आहेत.

याबाबत सामाजिक कार्यकर्ते सुधीर रामचंद्र आल्हाट (वय ५४, रा. नरवीर तानाजीवाडी, शिवाजीनगर) यांनी शिवाजीनगर पोलिस ठाण्यात फिर्याद दिली आहे. पोलिसांनी दिलेल्या माहितीनुसार, महापालिकेच्या अतिक्रमण विभागाचे उपायुक्त असलेले सोमनाथ बनकर हे २००८ मध्ये पुणे महापालिकेच्या डॉ. बाबासाहेब आंबेडकर वसतीगृहात पर्यवेक्षक होते. त्यावेळी त्यांनी सिक्कीम मणिपाल युनिर्व्हसिटीमधून २००८ आणि २००९ या शैक्षणिक वर्षांमध्ये एमबीएची बनावट पदवी मिळविली. याबाबतची नोंद त्यांनी सेवा पुस्तिकेत नोंद करुन घेतली. त्यावर तत्कालिन शिक्षणाधिकारी सुधाकर तांबे यांची स्वाक्षरी होती.

त्यानंतर तक्रारदार आल्हाट यांनी सिक्कीम मणिपाल युनिर्व्हसिटीमध्ये माहिती अधिकारात अर्ज केला होता. सिक्कीम मणिपाल युनिर्व्हसिटीने सोमनाथ बनकर या नावाच्या कोणत्याही विद्यार्थ्याने पदवी घेतली नसून ही पदवी बनावट असल्याचे कळविले. याबाबत पोलिसांकडे तक्रार अर्ज दिल्यानतंर याप्रकरणाची शहानिशा करण्यात आली. चौकशीत फसवणुकीचा प्रकार उघडकीस आल्यनंतर संबंधितांविरुद्ध गुन्हा दाखल करण्यात आल्याची मााहिती पोलिसांनी दिली. वरिष्ठ पोलिस निरीक्षक चंद्रशेखर सावंत तपास करत आहेत.